Илсөя, мин сиңа телим...

Илсөя Бәдретдинованың бүгенге акылы белән 18 яшьлек кичәге Илсөягә нинди теләкләр җиткерәсе килүен белештек. Әйдәгез әле яраткан җырчыбызның үз-үзенә теләгән теләкләрен белик. 

«Илсөя, мин сиңа телим:
бернәрсәдән дә курыкма! Кеше сүзенә карап, барган юлыңнан кире борылма! Син беркемнән дә ким түгел.

Үзеңне хөрмәт ит, очсызланма!

Кияүгә яратып чык, ләкин бу сукыр ярату булмасын. Алдын-артын уйлап чык. 

Инглиз телен яхшылап өйрән, бик кирәге булачак. Компьютерны тирәнтен өйрән. 

Чәчеңне буя, кис... теләсә нишләт. Кысканы кияргә дә кыенсынма – синең бик матур чагың. 

Эчмә, тартма, сүгенмә! Чынлап та, матур түгел болар. Леди бул!

Спорт белән дуслаш, фигураң матур булачак. Яшь чактан ук гәүдәңне формага сал. 

Ялгышудан курыкма. Бөтен кеше дә ялгыша. Ялгышмый гына өйрәнеп булмый. 

Тешләреңне яшьтән сакла. Соңыннан тешле булуы бик кыйммәт. 

Карабодай боткасы ашасаң, тәлинкәсен шунда ук юып куй!

«Юк!» дип әйтергә өйрән. 

Сер ул – сер. Синең турында никадәр азрак информация белсәләр, шулкадәр яхшырак. 

Әтиең белән әниең җыр йөзендә сине иң нык яратучылар. Аларны үпкәләтмә. Син аларның кадерен олыгайгач аңлаячаксың.

Дөнья шундый зур! Ә син шундый яшь һәм молодец! Синең бар да яхшы булачак. Яшә, Илсөя! Син барын да булдырачаксың! Мин сине яратам!