2019 елның 21–27 гыйнварында Казанда WorldSkills (Competition Preparation Week) стандартлары буенча һөнәри осталык буенча Дөнья чемпионатына әзерлек атналыгы уза.
Бу турыда “Татар-информ” агентлыгында узган матбугат конференциясендә WorldSkills International башкарма директоры Дэвид Хоуи, ТР Премьер-министр урынбасары – мәгариф һәм фән министры Рәфис Борһанов, «Яшь профессионаллар (Ворлдскиллс Россия)» Берлегенең генераль директоры урынбасары Карина Саликова сөйләде.
“Чемпионат тел-теш тидермәслек итеп узачагына ышанам. Татарстан, Россия һәм бөтен дөньяда профессиональ күнекмәләрнең киләчәк өчен ни дәрәҗәдә әһәмиятле булуын аңлаячаклар, дип өметләнәм», – диде Дэвид Хоуи. Ул шулай ук эшче һөнәрләрне үзләштерү «карьера баскычлары буйлап күтәрелү өчен дөрес юл», дип билгеләде.
Әлеге атналыкта исә 62 илдән 600 кеше катнаша. Алар – Директорлар советы, WSI секретариаты, WSIда катнашучы илләрнең делегацияләре башлыклары, техника һәм рәсми делегатлар, экспертлар, тим-лидерлар, оештыру комитеты әгъзалары, партнерлар һәм башкалар.
Атналыкта чемпионатка әзерлек барышы тикшереләчәк. Шулай ук атналыкта катнашучылар Чемпионат өчен махсус төзелүче «Казань Экспо» үзәген, WorldSkills Авылын караячак.
Чара кысаларында «Бер мәктәп – бер ил» укыту-өйрәтү программасына да старт биреләчәк. Әлеге программа эшче һөнәрләр престижын күтәрүгә һәм профориентацияне камилләштерүгә юнәлтелгән.
Шушы көннәрдә Дөнья чемпионаты башланырга калган көннәрне саный торган Стела да ачылачак.
Исегезгә төшерәбез: WorldSkills Kazan 2019 22–27 августта уза. Анда алтмыштан артык илдән 1600 дән артык конкурсант катнаша. Алар 56 компетенция буенча ярышачак.
Ландыш Әбүдарова,
Комментарий юк