Помидорлы, сырлы самса

«Сөембикә» журналын укучылар Венера АРСЛАНОВАның рецептларын яратып өлгерде инде. Аш-су остасы буларак, ул көн дә куллана торган иң гади ризыкларны да үзенчә төрләндереп, яңа рецептлар уйлап чыгарырга ярата. 
Бу юлы ул тәкъдим иткән самса да гадәти генә түгел – яшелчәле, сырлы самса. 
Быелгы апрель Рамазан аена туры килә. Күпләрегез Аллаһы Тәгаләнең ризалыгы өчен ураза тотадыр. Венера ханымның рецепты белән шушы самсаны пешереп карагыз әле. Ул, әлбәттә инде, бик тәмле һәм туклыклы. Камыры кетердәп тора, помидор, салат яфрагы һәм сыр эчлегенә сусыллык һәм үзенчәлекле тәм бирә. Бу самсаны ифтар табынына әзерләсәгез дә оттырмассыз. Һәркемнең кулыннан килерлек, җайлы гына әзерләнә. 

Кирәк (камыр өчен)
250 мл җылымса кайнаган су;
400 г он;
1 чәй кашыгы тоз;
100 г йомшарган атланмай.
Эчлек өчен:
300 г ит;
2 баш эре суган;
100 г сыр;
1-2 помидор;
бер тотам яшел салат яфрагы;
тәменчә тоз-борыч, паприка.
Моннан тыш, самсаларның өстенә сылар өчен бер йомырка да кирәк булачак. 

Эш барышы

1. Итне өчпочмакка тураган кебек, вак кына шакмаклап турыйбыз. Терлек ите урынына кош итен дә кулланырга була.
Суганны ваклап турап, ит янына кушабыз. Тоз-борыч, паприка сибеп, барысын бергә болгатабыз. 

2. Тирән эчле савытка су, тоз, он салып, кыстыбыйга баскан шикелле камыр басабыз. Камыр кулга ябышмаслык булсын. 
Әзер камырны ике тигез өлешкә бүлеп, 15 минут ял иттерәбез. Өстен капларга онытмагыз, камыр җилләмәсен!

3. Ике кисәкне дә, кыстыбыйга җәйгән кебек, аерым-аерым җәябез. Һәр ике җәемгә дә атланмай ягып, берсе өстенә икенчесен куябыз һәм рулет сыман тәгәрәтеп төрәбез. 

4. Төргән камырны 60 граммлы 14 кисәккә бүләбез. Һәрбер кисәкне өлеш тәлинкәсе зурлыгында җәябез. 

5. Һәр җәем төбенә берәр салат яфрагы куеп чыгабыз. Яфрак өстенә итле эчлекне салабыз. 
Помидорны юып, артык юка итми генә тәгәрмәчләп турыйбыз. Эчлек өстенә берәр тәгәрмәч помидор куябыз. Помидор өстенә эре угычтан уылган сыр түшәлә. 

6. Җәемнең читен өскә таба күтәреп, пәрәмәч бөргән сыман бөрәбез. Уртасын зуррак калдырабыз – сыр күренеп торсын. Самсаларны майланган табага тезеп, өстеннән күпертелгән йомырка сылыйбыз һәм 180 градус кызулыктагы мичкә тыгабыз. 

7. 40 минуттан – өсте кызаргач, самсаларыбыз әзер була.

Ашларыгыз тәмле, тоткан уразаларыгыз кабул булсын!